للأسف كلمة الحمد لله الفترة الأخيرة بقت بتتقال في مواضع كتير غير موضعها الأصلي والصحيح وهو شكر الله فعلاً من القلب وقت اللين والشدة, دلوقتي ممكن تلاقي البنت فركشت مع صاحبها تقوم تدخل تكتب الحمد لله وبعدها 3-4 نقاط, مع ملاحظة ان النقاط دي علامة علي التردد, بعد كام يوم من كتابة الحمد لله تبتدي تشد في شعرها وتسرخ وتبات عند نونا صحبتها تشتكي همها وتحكلها عن افار الانتحار من غير حمادة في حياتها ..
الكلمة بقت عادي, ممكن بعد ما الواد يعمل مصيبة وتعدي يحمد ربنا ان ابوه وامه ولا اخدوا بالهم, الحمد لله المراقب مشافوش وهو بيغش, الحمد لله النت موجود نتفرج بقي علي أباحة, الحمد لله .. الحمد لله
سيبك من الكلام اللي فوق خلاص, هنقول ايه ونهاتي في ايه, تعالي ندخل في موضوع ان الناس كلها نوعين فقط مش كتير, واحد بيحمد ربنا بالطول وواحد بيحمد ربنا بالعرض, الكلام مريب ممكن شوية, بس هو تمثيل هندسي نوعا ما للعبادة عشان الناس تفهمني,
هات وورقة وقلم دلوقتي وانت بتقرأ الكلام دة وابتدي اكتب الحاجة اللي انت بتحبها, كام واحدة منهم اللي نفسك فيهم أوي, وبعد كدة اكتب الأساسيات من مأكل ومشرب ومسكن وملبس, اكتب الصحة والعافية والسمع والبصر, اكتب الزعل والمرض والضعف والفشل, اكتب الحلو والمر, اكتب 10 كلمات, 20 كلمة, 30 مثلا, خليهم رقم مقفول, بعد كدة اقسم 100 درجة علي السطور بالتساوي
الورقة: المجموع:
الصحة
المال
الجمال
العربية
نتيجة الكلية
إلخ ..
ابتدي بقي يا صديقي تفكر في واحدة واحدة من الحاجات المكتوبة, العربية مثلاً, ممكن تكتب صفر, بس ايه دة, أحمد صاحبك عنده عربية أخر موديل, دة لو مكاني هيكتب ال10 كلهم,
الصحة, ممكن تكتب 8, ان انت الحمد لله بتبقي تعبان كل فين وفين بس مثلاً ابن خالتك الصغير طول النهار عيان وبيغيب من المدرسة ويوم لما صدرة بيقفل بتبقي مشكلة, كان زمانه كاتب 2 أو 1 كمان
نتيجة الكلية, الحمد لله عندي 22 سنة واتخرجت وغير أكبر مني لسة مكمل مش عارف يتخرج, بس هكتب 9 عشان جبت جيد مش جيد جداً
المال, ياااه علي كمية الحاجات اللي انا نفسي اشتريها ومش عارف, دة انا يا دوبك بشتري لبس أوي الصيف والشتاء وخلاص, والموبايل اللي معايا بقي تعبان أوي ومش عارف أستعمله, ليه كدة يا رب بس ..
تبتدي تمسك حاجة حاجة من دول, الحاجة الحلوة تحمد عليها ربنا أوي انك كويس فيها, أما الحاجت اللي واخدة نتيجة ضعيفة, تبتدي تغضب عند السطر بتاعها وتشخبط ويمكن كمان تتعجب من ربنا وتكون ناقم وتبدأ في مرحلة اشمعني ومش اشمعني, تنسي خالص حمد ربنا عند بعض السطور
بس في فكرة جميلة, بعد ما تخلص ابتدي اجمع الأرقام اللي علي الشمال اللي انت كاتبها بإيدك, وشوف المجموع هيبقي كام من ال100 اللي مكتوبة تحت, ابتدي تخيل أحمد صاحبك أبو عربية أخر موديل, اكتب أرقام تقديرية لو انت كنت مكانه, هتُصدم
المجموع الكلي من 100 متشابه أوي وقريب جدا من بعضه, طيب إزاي !! دة راكب عربية جامدة وأبوه غني أوي, اهه بس أمه اللي يرحمها وأخوه بيتعالج من مرض خبيث
ساعتها فكر تاني, هتفضل تحمد ربنا عند الحلو بس وتنساه عند المر ؟ ولا هتحمد ربنا علي المجموع الكلي اللي يعتبر متوسط ومعقول زي بقيت الناس ؟
إحمد ربنا بطول السطور وليس عرضها, إحمد ربنا وانت واقف علي طولك قبل ما تنام علي عرضك :)
ليست هناك تعليقات:
إرسال تعليق