السطور القدمة كلها كلام حقيقي من حكاوي قهاوي, سائقي تكاتك, مشاريع, بوابين العمارات, شباب الكليات والمقال ليس للسخرية أو الدفاع عن المتحرشين:
انتشرت في الفترة الأخيرة ظاهرة التحرش بطريقة غريبة في مصر, ممكن يكون السبب تسيب أمني, إنفلات أخلاقي, بس الحقيقة المرة ان البلد هي السبب في الظاهرة دي أو علي الأقل من أهم العوامل التي ساعدت علي انتشار المرض الخبيث عند معظم الشباب أو أكثرهم
ظاهرة التحرش نابعة عن كبت جنسي رهيب بين شباب جيل اليومين دول, الشاب بينزل من البيت وأول ما يشوف بنت بيحس بالحرمان, يتلذذ بالنظر لجسم البنت دي, أو ملامح وجهها, وساعات الموضوع بيكبر انه عايز يلمسها, يحس جسمها دة عبارة عن ايه ؟
فكرت كتير في الموضوع ووضعت نفسي مكان المتحرش دة, ايه الممكن أفكر فيه ؟ لقيت ان في عوامل واسباب كتيرة أوي لإحساس الحرمان والكبت اللي عند الشاب المصري خصوصا الطبقة المتوسطة وما تحتها, ممكن يكون أغلبها بسبب الحكومة ؟ تضخم الأسعار ؟ التخلخل الأمني والسياسي في البلد ؟
مسكت حالة لشاب معدوم من الناس اللي بتتحرش, هتلاقي الموضوع مادي بحت, انا كشاب مصري, مش لاقي أكل, ولا معايا فلوس كافية إني أصرف علي نفسي حتي, مافيش شقة ولا عربية ولا مهر ولا شبكة, هتجوز إزاي ؟ هعرف أمارس الجنس عادي في الحلال ؟ طبعاً لأ ,, خصوصا في الظروف اللي احنا فيها الناس اللي بتصبر علي فرج ربنا يتعدوا علي الصوابع, هبتدي انا كشاب في الحال دة أفرغ الطاقة والكبت اللي عندي إزاي ؟ أتحرش
تعالي علي موضوع تاني غير ظروف الحياة والمعيشة في مصر, في السلاح اللعين اللي محدش عارف قيمته اساساً, التعليم, التعليم سلاح ذو حدين, يا تستفيد منه انك تنور عقول الأطفال عشان لما يدخلوا سن المراهقة أو يكون سلاح دمار شامل يطلع جيل فاقد الهوية, وللأسف عندنا مافيش تعليم من أساسه, احنا كل حاجة بنهتم بالقراءة والنصوص والنحو والكلام العلمي بس, بس انك تعلم الأولاد أخلاق أو قيم او عادات وتقاليد طيبة ف دة شئ مش موجود اساسا, الولد بيطلع حافظ النص بس مش فاهمه, دروس القراءة بتتكلم عن قصص قديمة فانية ولا ليها أي دعوة بمشاكلنا العصرية, مناهج قديمة بالية, وتيجي ما تنزل بالمستوي في القري والأرياف المصرية في المدارس العربي والكتاب, هتلاقي تعاليم ان جسم البنت حرام وإزاي ولد يقعد مع بنت ويوصل الموضوع لضرب الولد بالعصاية لما يكلم بنت, بيبني الكلام دة حالة من الكبت وبعد كدة حالة من الحشرية, ليه جسم البنت حرام وليه ماينفعش أقعد معاها؟؟
من المشكال اللي حصلت وبتحصل فعلاً مثال البنت في فيلم "بحب السيما" لما كانت تدخل الحمام مع الأولاد عشان تقلع قدامهم .. هما أصلاً مش فاهمين حاجة, بس محدش فيهم متعلم صح ولا ليه كدة حرام, واسلوب التعنيف بيخلق عند الولد حاجة انه عايز يستكشف ويجرب بنفسه, لما يكبر وهو مكبوت ومش متعلم وبيضرب عي إيده عشان جسم البنت هيعمل ايه ؟ هيتحرش
من أهم العامل كمان البيت والبيئة اللي الولد بيطلع منها, في ناس علمت نفسها بنفسها في القري كمان ولامدرسة ولا اي حاجة بس الفكرة الأهل ناس كويسة ووصلوا رسالة شريفة واضحة للأبناء, في أهل بيعملوا حركات امام عيالهم لا تصح ولا تنفع, إيحائات أو تلميحات جنسية.. ألفاظ خليعة, و ساعات قبلات وأحضان الولد الصغير ولا حيفهمها, بس أهم حاجة ايه هيطلع مع أي بنت يجربها, ولما يلاقي البنت مستغربة وترفضه, هيتحرش, كفاية وهو شايف أخوه الكبير علي أول الشارع بيتكلم بألفظ مقززة وبيتحرش باللفظ واليد, هيتعلم منه الحركات السلبية دي
الكلام مش بس علي الولاد وانهم الجنس الفاشل, بالعكس, في بنات كمان هي السبب, هي اللي بتمسك الولد من إيده وهي اللي بتدفعه انه يمارس معاها أي فعل جنسي, زي ما قولنا, ظروف الحياة بالنسبة للولد هي كمان بالنسبة للبنت, تخيل معايا, ودي حقيقة ان كل ولد في مصر له 9 نساء عايشين ؟ أخدت بالك من الرقم ؟ مع العلم ان معظم الولاد مش عارفين يتقدموا او يبنوا نفسهم حتي, تبتدي البنت تكبر في السن وجمالها يروح و لو بنت ناس هتصبر وتسكت, بس لو مش متعلمة, هتبتدي تاخد خطوة انها تحس بأنوثتها بطريقة غلط, هتغري الولد للتحرش
من العادات المصرية في بعض الأسر الفقيرة او معدومة الحال تلاقي البنت لسة مجابتش ال5 سنين ومحجبة ؟ مغطية شعرها ومش فاهمة ليه ؟ يبتدي الكبت عندها انها مش حاسة انها بنت زي بقيت البنات اللي بتشوفها وهي رايحة المدرسة, عايزة تجرب تعيش حياتها, عايزة تقلع الحجاب قدام ولد ويديها كلمة حلوة انها جميلة كدة, وممكن يكون عامل من عوامل التحرش مع تطور العلاقة
من أبشع العوامل للتحرش في بلدنا للولاد والبنات هي الأفلام الإباحية, الموضوع بقي منتشر جداً وكل واحد عايز انترنت في بيته علي جهاز خاص او علي الموبايل وساعات محلات الكمبيوتر في المناطق الفقير تتيح لك الفرصة للمشاهدة عادي من غير أي مشاكل, لما الأفلام دي تشدني للبنات ومش عارف أتجوز, هبتدي أنطلق للحرام خلاص وأم إيدي علي البنات
من أبشع العوامل للتحرش هو ضعف الدين, خلاص مافيش تعاليم دينية بسيطة او وسطية لرقي المجتمع وراحة البال للفرد, مافيش أي اهتمام بمناهج ولا امتحانات الدين ولا حتي مدرسين الدين, لما مدرس العربي بيبقي فاضي بيدخل الحصة يقرأ قرآن وخلاص او بعض الأولاد بتطلبها حصة ألعاب وبينزلوا يلعبوا فعلاً ما الدين مش في المجموع, ومؤخراً الموقف السياسي من الإخوان, أصبح الدين بالنسبة للكثيرين نقمة, لو انت بتصلي في مواعيد الصلاة تبقي إخوان, لبست جلبية في صلاة الجمعة تبقي إخوان, مشغل قرآن في العربية تبقي إخوان, ومن الناحية التانية كل ما تقابل واحد بدقن يبقي كل حاجة عنده حرام .. حرام .. حرام لحد ما توصل لموضوع البنات, خلاص يا شيخنا مكبوت مش قادر, صوت البنت عورة, مش عارف أصلي, يعني ايه ربنا ؟ جسم البنت حرام, السلام باليد حرام .. كله حرام, انا اسف يا مولانا, خلي الحرام ينفعك, هتحرش
انا كولد فقير شوفت البنت الغنية الحلوة ماشية في الشارع, خلاص مش قادر ولا عمري هطول واحدة زيها, هتحرش
انا كبنت شغالة في بيت سيدي وابنه حلو وعنده عربية وغني, هعرض جسمي عليه بس واحد غني يحسسني بأنوثتي ولو مرة
الكلام في الموضوع دة فعلاً كتير, وأطفال الشوارع في إزدياد من كمية الزنا الرهيبة,
الكلام اللي فوق مش مبرر ولا للعطف دة مجرد شرح حالة طبيعية, يا ريت الحكومة يكون ليها دورو الشباب, الجمعيات الخيرية وحملات التوعية الجنسية في القري والمناطق الفقيرة, الكلام دة والتحرش مش هيخلص بالأماني, لازم خطوة لازم فعل
وجعلتني تعود علي أمنا الحبيبة, مصر :)
وجعلتني تعود علي أمنا الحبيبة, مصر :)
