مسلمين ومسيحيين

• 
  موضوع الليلة, المسلمين والمسيحيين:
  
  - من مشاكل الفترة الأخيرة, تخوف المسيحيين من الإخوان المسلمون, يعني كانت الست تبقي ماشية, خايفة حد يعورها لو راسها عريانة وشعرها باين, خايفة علي بنتها وهي ماشية راجعة من الدرس, خايفين من ضرايب زيادة, غرامات, معاملة سيئة, ممكن نصفهم كان شايف مستقبله بينهار أكتر في البلد, وكندا هي الحل ..
  
  بس قبل المشكلة دي, في مشكلة الأحياء المصرية المطحونة, ليه ؟ عشان كثرة النميمة, ممكن تلاقي 2 مسلمين بيتكلموا يقولك "أه يا عم أصل دول مسيحيين عليهم فلوس قد كدة", وممكن تسمع 2 مسيحيين بيقولوا "يا ابني خلينا في حالنا مع بعض", وكلمات شائعة كتير زي "احنا" .. "هما" , "انا وانت", في علي طول خوف كدة من الإختلاف, بس الصراحة ال يحتاج تناول أكتر هو كلام المسلمين علي المسيحيين (البعض يتكلم وليس الكل), والمشكلة ان الكلام مبقاش مجرد كلام تطور ووصل للشتيمة, بس انا عندي بعض الملاحظات قبل ما تشتم, والملاحظات دي مش دفاع عن المسيحيين أو حاجة دي مجرد حقيقة انا مش جايب حاجة من عندي:
  
  - ممكن تلاقي مسيحي علي طول متصور مع أبونا, وفرحان ومبسوط وفي عيد وأحلي كلام, مع انك انت يا مسلم, متصور مع شيخنا الجهادي التفجيري الزغلولي, انت ال بتشتم يعني, وعلي طول الراجل الشيخ دة مش بيشتم المسيحين بس, دة مقسم المسلمين كمان, انا لو عليا ممكن أتصور مع الشعراوي, بس مش ال .. يلا ما علينا
  
  - اتفرج علي أنشطة الكنيسة, رحلات وندوات وكل ال نفسك فيه, اه في جوامع بتعمل أنشطة, تفيظ قرآن وكله تمام, بس قبل ما تشتم شوف كام زاوية وركن للصلاة فيه واحد متشدد مش فاهم دين, وكان بيتكلم بألفاظ خارجة عن سياسة ومسيحيين وشتيمة في أي حد يعاديه ,,
  
  - 90% من الصيع والبلطجية اسمهم حمادة تقريباً وبعد حمادة اسم شهرة زي التعلب مثلاً
  
  - زي ما في مسلمين متشددين, في مسيحيين متشددين, دة لا تحتاج مناقشة, بس الفكرة يا مسلم يا متشدد, ممكن يكون عندك رسالة معينة أو هدف معين من كلامك, الفكرة في الطريقة, التكفير والتنفير والتخويف وان كل مسيحي في النار ومش عارف ايه, وانت مالك ؟ ما عليك إلا البلاغ المبين .. في سماحة الرسول (ص) ؟ المهاجرين والأنصار وموقف الرسول مثلاً ؟
  
  طريقة كلامك التشددية دي عاملة زي اليهود, مقتنعين 100% انهم شعب الله المختار, منهم من يرتكب الفواحش ويقولك ما انا كدة كدة مختار, ويعيش الدور, من تواضع لله رفعه.
  
  عزيزي المسلم أو المسيحي, فلتقل خيراً او لتصمت, ادعو لله, للمحبة, هتلاقي المشترك بين الأديان كتير أوي والله وممكن تتكلم فيه ليل نهار,
  
  القرن ال21, ولسة سيسي ولا مرسي, مسلم ولا مسيحي, في أصلاً قارات تانية غيرنا خلصت من المشاكل دي وبتتخانق المريخ ولا زحل عليه مياه !!!
  
  علي الحياد

الأب والأم

الأب:
- يعمل ليل نهار عشان حضرتك تاكل وتملي كرشك
- يشتريلك Samsung S4 وممكن هو يكون ماسك موبايل نوكيا بكشاف
- يديلك مصروف بما يعادل مرتب موظف حكومي
- يجبلك عربية اول ما تتخرج او يديك عربيته ال دافع فيها دم قلبه
- يجبلك أحلي لبس وأخر شياكة
- يشتريلك شقة وشبكة لمراتك انت وأحلي مهر كمان
- يوصل ويجيب ويسهر ويدورك علي لبن العصفور لما تحتاجه إلخ .. إلخ

الأم:
- تذاكرلك علي قد ما تقدر
- تسهر جانبك ليلة امتحانك
- تحضرلك 3 وجبات يومياً
- تغسل غسيلك كله بما فيه شربات حضرتك المميتة
- تنضف البيت علي الأقل مرة في الأسبوع وتشيل زبالة حضرتك علي الأرض
- كفاية حملت فيك 9 شهور

(الموبايل يرن)

الطفل لواحد صاحبه:

أهلي دول نفخ يا أخي انت مش عارف دول بيعملوا ايه, دول .. دول ..

لو عديت فضلهم عليك هتلاقي كتاب حياتك علي بعضه لا يكفي انك تكتب فيه ..

ربنا يهديك يا شيخ ..

الزواج في مصر

مع احترامي الشديد (كلمتي المشهورة اللي بقولها بدل ما اشتم), موضوع الزواج في مصر دة قمة الاستفزاز والرجعية, الحياة العاطفية تبدأ ب 2 بيحبوا بعض عادي جدا, في مرحلة إعدادي بقي ولا كلية مش فارقة, المهم الموضوع لذيذ شوية غيرة وهبالة عيال (شئ عادي) بعد شوية كمان لو الموضوع بجد تبدأ مرحلة بابا عايز يشرب القهوة مع باباكي .. هنا تبدأ مرحلة ان بابا العروسة يتحول إلي تاجر كبير عايز أكبر تمن في سلعته وبابا العريس راجل غلبان في محل وبينزل في السعر. 

- الشبكة يا ابني من 70 إلي 100 ألف جنيه .. حضرتك عارف بتتكلم في كام ورقة ؟ عارف 100 ألف دول يأكِلوا كام مسكين ولا ينقذوا كام مريض من الموت ؟ معلش انا آسف انا لما اتجوز واحدة (المفروض) هي عايزاني وانا عايزها, لا انا طمعان في حاجة ولا هي مستنية الشبكة المبهرجة وخلاص ولو جبت خاتم ذهب ليها وواحد فضة ليا الموضوع تمام وكل ما يكون معايا فلوس يا سيدي الفاضل هغرقها هدايا

- يا ابني الشقة لازم تكون مش أقل من 120 متر .. والله يا حج يعني نصف عظماء مصر كانوا ساكنين في كشك ولا في عزبة وطه حسين طلع بوز أهله لحد ما بقي حاجة .. مش ال120 متر اللي هيخلوا بنتك أميرة ولا ياما هنا وياما هناك, وفي ناس ساكنة أصلا 7 أفراد علي سرير واحد .. الفكرة في الترابط الاسري سيدي الفاضل وازاي البيت دة هيحافظ علي أولاده ويطلعوا ناس كويسة.

- يا ابني تشطيب الشقة لازم يكون علي الاقل 50 الف جنيه وطالع .. طب يا فندم انا عندي واحد حبيبي هيعملي القة كلها ب30 .. كُخة ؟ ولا لازم أحاسب حضرتك بالفواتير واثبتلك إني شديد ؟

- يا ولدي لازم الاجهزة كاملة من مجامعها, اللي بتعمل الشاي واللي بتعمل القهوة واللي بتنشف الغسيل .. حضرتك محتاج جهاز يحطلك المعلقة في فمك الراقي ؟ ما طول عُمر أهالينا بنغلي المياه علي النار وبننشر الغسيل في البالكونة ومحدش مات ولا حد نام جعان .. بلاش هبالة بقي .. نص بيوت مصر فيها اجهزة مركونة ولا بتتلمس وانا ممكن افكس 4 او اجهزة واجيب تلفيزيون 50 بوصة ولا عيب يا عمو ؟! توظيف الفلوس في حاجة مفيدة مش عيب

- يا ابني العربية لازم علي الزيرو المستعمل ما ينفعش لبنتي وهيتعبك .. وانت مالك !! انا اللي هصر قطع الغيار وهصلح واوصل واجيب .. ولما ربنا يكرمني اجيب احلي عربية ونعمل بيها حركات

** الفكرة مش فيا انا بس .. ابو العروسة ذات نفسه لازم يشتري الصيني وطقم الجيلي و و و ... في ايه يا جدعان ؟ نصف جهاز العروسة دة تفكير جاهلي اوي وكله بيترصص منظر وديكور بس في الآخر .. يا جماعة الفلوس اللي انا هوفرها دي هشلها لعيالي عشان اربيهم صح ونعمل احلي جيل .. والفلوس اللي ابو العروسة يشلها يتفسح بيها هو والحجة ولا يجيب هدايا لولاده ولا يعمل أي حاجة

** لو واحد ربنا مديله هيدفع الكلام دة ماشي وهيندم وهيفضل عايش طول النهار مخنوق ومهموم وكل ما يزعل ما مراته هيقول لها ماتنسيش انا دافعلك كام

** وكل الهبالة دي اكبر سبب في حاجتين, الحاجة الولي طمع رجال الاعمال والتجار .. ما هو شايف شباب اهبل بيضحك عليه ويشتري اي هبالة وبيرمي فلوسه في الارض خلاص بقي ارفع الاسعار واستغل

واكبر سبب للكبت الجنسي في الشارع المصري .. لما كل شوية الطبقة المطحونة شايف بنات حلوة بس عارف ان عمره ما هيطول واحدة منهم عشان فقير .. والبنت المكبوتة شايفة معظم الشباب معاهومش فلوس وجوازها هيتأخر تقوم تلبس ديق وكعب عالي وتتنزل تتمايل لده وده 

إرحموا اللي جابونا البلد اصلا منهارة اقتصاديا واحنا بندفع فلوسنا في هبالة .. واللي مش عاجبه كلامي هو حُر  !

5 جنيه لرشيد

نزلت اشتري شيبسي من علي اول شارع من عند الراجل حبيبي .. دخل المحل مرة واحد كدة واحد من المنطقة بس من الطبقة الغلبانة اللي في حالها ومعاه صورة من البطاقة وش وظهر. فالراجل صاحب المحل بيسأله مالك يا ابني في ايه ؟ قاله معلش دي صورة البطاقة كنوع من الضمان عشان انا محتاج اخد منك 5 جنيه اروح بيها للجيش في رشيد واول ما ارجع من السفر هتاخودها مني ولو مقدرتش دي صورة البطاقة واعمل اللي انت شايفه صح

. والله ما قدرت علي الموقف وفضلت مشلول في نص المحل. للدرجادي الدنيا دي "دنيا" اوي كدة ؟ شوية ورق مصنوع من القطن ومكتوب عليه ارقام ممكن يحدد مصير عبد ؟ ماديات الدنيا شغلانة اوي كدة والناس الواصلة عمالة تبهدل فينا والاحتكار هيخالينا نشحت ؟ انا اعتبر من الطبقة المتوسطة وفي حاجات كتير بستغني عنها عشان احوش فلوس احتياطي لاي ظرف وبطلت اطلب من كتر ما شايف البلد بتدبحنا. بس هنفضل كدة لحد امتي. الفكرة مش في مصر ولا اخوان ولا جبهة ولا زفت. الفكرة ان حاجة مش دايمة ماسكة في رقبتنا كدة وعمالة تطحن فينا وناس عمالة تتاخد في الرجلين. دة ولا فاهم سياسة ومش بعيد يكون أمي وجاهل .. بس عنده ضمير :) وواخد معاه اثبات ضدده انه هيكون مذنب لو مرجعش ال5 جنيه ..

 ارحمنا برحمتك يا رب .. متسبش حد جعان ولا سقعان ولا حد من غير بسمة علي وشه. والله الحمد لله علي كل شئ الدنيا حقيرة وفانية